Um viðburðinn

Glæpur og refsing — undir leiðsögn Gunnars Þorra

Glæpur og refsing eftir Fjodor Dostojevskí er ein merkasta skáldsaga vestrænna bókmennta.
Í einstökum salarkynnum Hótels Holts mun Gunnar Þorri Pétursson kafa ofan í þessa
kynngimögnuðu skáldsögu þar sem undirheimar Sánkti Pétursborgar eru sögusviðið og
krufnar eru til mergjar stórar spurningar um manneskjuna, Guð og Rússland.

Gunnar Þorri hefur rannsakað verk Dostojevskís um áratugaskeið og tvívegis hlotið íslensku
þýðingaverðlaunin: Annars vegar fyrir þýðingu sína og Ingibjargar Haraldsdóttur á skáldsögu
Dostojevskís, Hinir smánuðu og svívirtu, en hins vegar Tsjernobyl-bæninni eftir Svetlönu
Aleksíevítsj. Á liðnu ári gerði Gunnar Þorri þættina Rús sem slógu í gegn á Ríkisútvarpinu og
um árabil hefur hann haldið úti vinsælum námskeiðum um rússneskar bókmenntir.

Námskeiðið er fjögur skipti, það er haldið á miðvikudagskvöldum og dagsetningar eru
eftirfarandi: 17. og 24. janúar og 7. og 14. febrúar (31. jan. verður lestrarfrí).

Ekki er nauðsynlegt að hafa lesið skáldsöguna þegar námskeið hefst. Athugið að námskeiðið
er styrkhæft hjá ýmsum stéttarfélögum og að sætafjöldi er takmarkaður.

Látið ekki þetta einstæða tækifæri fram hjá ykkur fara.